Nazr bachaane ka afsaana dilfareb laga

Nazr bachaane ka afsaana dilfareb laga 

Humare dil ko yuN tarpaana dilfareb laga 

Sajayee yaadoN ki mehfil to yaad aayee teri 

Phir apne dil ko yuN behlaana dilfareb laga 

Hamein bi apni shikaston pe naz hone laga

Tera bi jeet pe itraana dilfareb laga 

Na pooche koi mohabbat meiN rog kaise haiN 

HumeiN ghamoN ka yeh meh khaana dilfareb laga 

Tu kaj kalaahoN ki mehfil meiN bawqaar raha 

DukhoN meiN mujhko yuN uljhaana dilfareb laga 

Gaya jo chhor ke tanha to chup se hum bhi rahe 

Gaya to ho ke jo begaana dilfareb laga 

Kabhi to hum bhi kaNwal mehfiloN ki jaan hue 

Kabhi humeiN bhi yeh Veerana dilfareb laga

Jaane aa pohnchi kis raH pe main

Jaane aa pohnchi kis raH pe main 

Yunhi chalte hue 

ke na khabar hai ab 

manziloN ke nishaN ki 

Dil ki aur na jism o jaaN ki 

Chalti bas jaa rahi hooN main ab 

Inhi anjaani si raahoN pe 

daste yaadoN ke naag jahaN 

hoga kya sochta dil hai mira 

iss bhiyaanak se andhere ne 

meri zaat o hayaat ko yuN 

kiya hai mehsoor ke 

har tarf haiN kayee humsafar mere aur 

phir bhi hooN jaane kyuN 

tanha........tanha.......yahaN 

phaile qehqe mere har taraf 

phir bhi hooN jaane kyuN 

ghamzada.....ghamzada... main yahaN 

hota mehsoos yuN ab mujhe 

ke udaasi ke kafan meiN lipti si hai 

zinda laash meri 

ho gayee ab yahaN 

uss lehad se bhi badh kar yeh zaat meri

Saraapa e aziyat

Saraapa e aziyat 

Main saraapa e aziyat 

Aur haiN daaman meiN mire kaante 

Khushi ke phool main laaoN 

Chun ke aakhir kis jahaN se 

Talkh yaadoN ki haiN zanjeereiN ab har soo 

Kaante hi kaante mere har soo 

tum mohabbat ke matlaashi 

aur hooN saraapa e nafrat 

laaoN halaawat ke main gul 

Chun ke aakhir kis jahaN se 

Apne hi hisaar meiN yuN 

Hui muqayad ke ab koi raah e faraar nahiN hai 

TumheiN miri sangat ki 

Aur saraapa e hijr hooN main 

phool sangat ke main laaoN kis jahaN se 

Rista lahoo dil ki in surkh deewaroN se 

girta ho wo jharna jaise aabshaaroN se 

ChahtoN ki barkha ho tum 

Aur hooN saraapa e Vehshat 

Dil ki narm laaoN mitti main 

Chun ke aakhir kis jahaN se 

Kar parastish tu na meri baad az khuda 

De sakooN gi na main silla ke hoon be wafa 

samjhe mujhe muqadas tum 

aur hooN saraapa e haqaarat 

yeh saheefe gulloN ke laaoN to laaoN 

Chun ke aakhir kis jahaN se 

Muqadar hua hai KANWAL ka bas yeh paani 

phir talaab ho ya ho ashk e rawaani 

Tum aman ke matlaashi hue aur 

main saraapa e baghaawat 

HaaN 

Tum saraapa e murawat 

Aur main saraapa e adaawat 

Main sakooN ke phooL laaoN 

Chun ke aakhir kis jahaN se