محوِ حیرت ہوں کہ کیا لکھوں؟؟؟
کن جذبوں کی للکار لکھوں؟
کن لفظوں کی یلغار لکھوں؟
اس تخیل کی بہتی ندیا میں
کیا سفینے کو سردار لکھوں؟
مقفلِ قلب میں اسیر بیٹھے
کس احساس کی پکار لکھوں ؟
مفلوجُ الجوارح اژدحام کو
کس معاشرے کا جانثار لکھوں ؟
آدمیوں کی اس بستی میں
کس کو قابلِ اعتبار لکھوں؟
خنساء عندلیب
*******
پانی پر لکھی کہانی
انبارِ الفاظ اٹھا کر میں
ساحل کے کنارے کھڑا تھا
زندگی کی دلفریبیاں
نگاہوں سے چن رہا تھا
کہ لہروں کی طغیانی نے
ذخیرہ الفاظ ہی بہا دیا
اب لفظوں کے دامن میں
تلاطم خیز موجیں ہیں
اور حرف حرف نہیں رہے
بس آنسوؤں کی بوندیں ہیں!!
حافظہ خنساء اکرم
********
No comments:
Post a Comment