Muhabbat rooth jaaye tau kabhi jeenay nahee deti

Wafa jab maslehat ki shaal ourhay
Sard rutt ka roop dhaaray
Dil ke aangan mein utarti hai

Tu palkoon per sitaaroon ki dhanak muskaane lagti hai

Kabhi khwaaboon k an- chouwoy khayalon se bhi Un-dekhi si,

anjaani si khushboo aane lagti hai

Kisi ke sang beetay, un-ginat lamhoon ki zanjeerain Achaanak zehan mein jab gun'gunaati hain

Nafs ke taar mein san'naatta yak-dam cheekh uth'ta hai

Tu yun mehsoos hota hai

Hawaayain aa ke sargooshi si karti hain

Muhabbat ka tumhein idraak ab tu hogaya hoga

Yeh jo bhi zakhm deti hai
kabhi seenay nahee deti
Muhabbat rooth jaaye tau kabhi jeenay nahee deti...