Abhi to ishq main aisa bhi haal hona hay

Abhi to ishq main aisa bhi haal hona hay
K ashq rokna tum se mohaal hona hay

Har aik lab pe hay meri wafa k afsanay
Tere sitam ko abhi lazawaal hona hay

Tumhain khabar hi nahin tum to loat jao gay
Tumharay hijar main ik lamha saal hona hay

Humari rooh pe jab bhi azaab utrain hay
Tumhari yaad ko is dil ki dhaal hona hay

Kabhi tou roye ga woh bhi kisi ki bahon main
Kabhi tou us ki hansi ko zawaal hona hay

Milay gi hum ko bhi apne naseeb ki khushiyaan
Bas intizaar hay kab yeh kamaal hona hay

Har aik shaks chalay ga humari rahon per
Mohabatoon main humain woh misaal hona hay
Zamana jis k kham-o-paich main olajh jaye
Humari zaat ko aisa sawaal hona hay

" yaqeen hay mujh ko woh loot aye ga
Usay bhi apne kiye ka malaal hona hay