Sahelio.....

Sahelio.....
Kabhi jo koi
Chahaton, mohabbaton ke baray tum se pooch le
Her ik pal gawah hai
Ke kis terha hamare ujle ujle dil duaaon jaisi
Chandni main nikhri nikhri chahaton ke geet se
Farishton jaisi preet se bharay rahay
Her ik pal gawah hai
Nigah utthi to iss qadar haya ki roshni liye
Ke aas paas daagh daagh aankh bhi chamak uthi
Zaban hili to lafz apni azmaton ko daikh ker
Khud apne aap dil main surkhuroo huwe
Her aik soch aayaton ka terjuma bani rahi
Her aik khwab rooh se nikal ke jaise rooh main uter gaya
Sahelio....
Kabhi jo zindagi main
Koi chahaton, mohabbaton ke baaray tum se pooch le
To tum zaroor ibadaton ke baaray uss se poochna