کچھ کہنے کا وقت نہیں یہ، کچھ نہ کہو، خاموش رہو

کچھ کہنے کا وقت نہیں یہ، کچھ نہ کہو، خاموش رہو
اے لوگو خاموش رہو, ہاں اے لوگو، خاموش رہو

سچ اچھا، پر اس کے جلو میں، زہر کا ہے اک پیالا بھی
پاگل ہو؟ کیوں ناحق کو سقراط بنو، خاموش رہو

حق اچھا، پر اس کے لئے کوئی اور مرے تو اور اچھا
تم بھی کوئی منصور ہو جو سُولی پہ چڑھو؟ خاموش رہو

اُن کا یہ کہنا سورج ہی دھرتی کے پھیرے کرتا ہے
سر آنکھوں پر، سورج ہی کو گھومنے دو، خاموش رہو

مجلس میں کچھ حبس ہے اور زنجیر کا آہن چبھتا ہے
پھر سوچو، ہاں پھر سوچو، ہاں پھر سوچو، خاموش رہو

گرم آنسو اور ٹھنڈی آہیں ، من میں کیا کیا موسم ہیں
اس بگھیا کے بھید نہ کھولو، سیر کرو، خاموش رہو

آنکھیں موند کنارے بیٹھو، من کے رکھو بند کواڑ
انشا جی لو دھاگہ لو اور لب سی لو، خاموش رہو

Dil kis key tasawar mein janey_Raaton ko pareshan hota hai دل کِس کے تصوّر میں جانے____ راتوں کو پرِیشاں ہوتا ہے

دل کِس کے تصوّر میں جانے____ راتوں کو پرِیشاں ہوتا ہے

یہ حُسنِ طلب کی__ بات نہیں، ہوتا ہے مری جاں! ہوتا ہے

ہم تیری سِکھائی منطق سے اپنے کو تو سمجھا لیتے ہیں

اِک خار _____ کھٹکتا رہتا ہے، سینے میں جو پنہاں ہوتا ہے

پِھر اُن کی گلی میں پہنچے گا، پھر سِہو کا سجدہ کر لے گا

اِس دل پہ بھروسہ____ کون کرے ___ ہر روز مُسلماں ہوتا ہے

وہ درد کہ اُس نے چِھین لیا، وہ درد کہ اُس کی بخشش تھا

تنہائی کی راتوں میں اِنشاؔ اب بھی مرا مہماں___ ہوتا ہے

Jogi ka bana kar bhais phirey

جوگی کا بنا کر بھیس پھرے

برہن ہے کوئی ، جو دیس پھرے

سینے میں لیے سینے کی دُکھن

آتی ہے پوَ ن ، جاتی ہے پوَن

پھولوں نے کہا، کانٹوں نے کہا

کچھ دیر ٹھہر، دامن نہ چھڑا

پر اس کا چلن وحشی کا چلن

آتی ہے پوَ ن ، جاتی ہے پوَن

اس کا تو کہیں مسکن نہ مکاں

آوارہ بہ دل ، آوارہ بہ جاں

لوگوں کے ہیں گھر، لوگوں کے وطن

آتی ہے پوَ ن ، جاتی ہے پوَن

یہاں کون پوَن کی نگاہ میں ہے

وہ جو راہ میں ہے، بس راہ میں ہے

پربت کہ نگر، صحرا کہ چمن

آتی ہے پوَ ن ، جاتی ہے پوَن

رکنے کی نہیں جا، اٹھ بھی چکو

انشاء جی چلو، ہاں تم بھی چلو

اور ساتھ چلے دُکھتا ہُوا مَن

آتی ہے پوَ ن ، جاتی ہے پوَن