Kion bujh kar raakh nahe hotay

Din raaat k aanay janay main

Dunya k ajaib khaanay main

Kabi sheeshay dhundlay hotay hain

Kabi manzar saaf nahi hotay

Kabi sooraj baat nahi krta

Kabi taaray aankh badaltay hain

Kabi manzil peechay rehtay hai

Kabi rastay aagay chaltay hain

Kabi aasain tor nahi charhtin

Kabi khadshay pooray hotay hain

Kabi aankhen daikh nahi saktin

Kabi khwab adhuray hotay hain

Ye sab to sahi hail akin

Is aashob k manzar namay main

Din raaat k aanay janay main

Dunya k ajaib khaanay main

Kuch saaya karti aankhon k pymaan to dikhai detay hain

Hathon sy agarchay door sahi

Imkaan to dikhai detay hain

Han…

Rait k is dariya sy udher

Ek pariton wali basti k

Unwaan to dekhai detay hain

Manzil sy koson door sahi

Pur-dard sahi, ranjoor sahi

Zakhmon sy musafir choor sahi

Par kis sy kahen ay jan-e-wafa

Kuch aisay ghao b hotay hain

Jinhen zakhmi aap nahi dhotay

Bin roye huway aansu ki tarha

Seenay main chupaa k rakhtay hain

Or saari umer nahi rotay

Neenden b mohaiya hoti hain

Sapnay b door nahi hotay

Kyun phir b jagtay rehtay hain?

Kyun saari raat nahi sotay?

Ab kis say kahen ay jan-e-wafa?

Ye ehl-e-wafa kis aag main jaltay rehtay hain

Kyun bujh kar raakh nahi hotay…??