affiliate marketing Famous Urdu Poetry: kia insha ji saudaaii hain???

Monday 18 February 2013

kia insha ji saudaaii hain???


kia insha ji saudaaii hain???


yeh batain jhooti batain hain, yeh logon nay phelai hain
tum insha ji ka naam na lo, kia insha ji saudaaii hain???

hain lakhoon rog zamanay main, kion ishq hai ruswa baychara
hain aur bhi wajhain wehshat ki, insan ko rakhti dukhiara
haan baykal baykal rehta hai, ho peet main jis nay jii hara
per shaam say lay kar subh talak yoon kon phiray ga awaara???
yeh batain jhooti batain hain, yeh logon nay phelai hain
tum insha ji ka naam na lo, kia insha ji saudaaii hain???

yeh baat ajeeb sunatay ho, wo duniya say bay aass huay
ik naam suna aur ghash khaya, ik zikr pay aap udaass huay
wo ilm main aflatoon sunay, wo sher main tulsi daas huay
wo tees baras kay hotay hain, wo B.A. M.A. paas huay
yeh batain jhooti batain hain, yeh logon nay phelai hain
tum insha ji ka naam na lo, kia insha ji saudaaii hain???

gar ishq kia hai tab kia hai? kion shaad nahi abaad nahi?
jo jaan liay bin tal na sakay, yeh aisi bhi uftaad nahi
yay baat tu tum bhi mano gay, wo Qais nahi Farhaad nahi
kia hijr ka daro mushkil hai? kia visl kay nuskhay yaad nahi???
yeh batain jhooti batain hain, yeh logon nay phelai hain
tum insha ji ka naam na lo, kia insha ji saudaaii hain???

wo larki achi larki hai, tum naam na lo hum jaan gayay
wo jis kay laambay gaisoo hain, pehchaan gayay pehchan gayay
han saath humare insha bhi uss ghar me thay mehmaan gayay
per uss se tu kuch baat na ki, anjaan rahe anjaan gayay
yeh batain jhooti batain hain, yeh logon nay phelai hain
tum insha ji ka naam na lo, kia insha ji saudaaii hain???

jo hum se kaho hum kartay hain, kia insha ko samjhana hai???
uss larki se bhi keh len gay, goh ab kuch aur zamana hai
ya chorain, ya takmeel karain, ye ishq hai ya afsaana hai???
ye kaisa gorakh dhanda, hai ye kaisa tana bana hai???
ye batain kaisi batain hain, jo logon nay phelai hain???
tum insha ji ka naam na lo, kia insha ji saudaaii hain???

No comments:

Post a Comment